Hesham Nazih .. Welcome Back

بعد الـخبر الغلط اللي نقلته هنا عن هشام نزيه من 4 شهور عن انه هيعمل موسيقى فيلم آسف على الازعاج

واكتشافي بعد نزول الفيلم ان الموسيقى كانت لعمرو اسماعيل مش لنزيه
تيقنت ان نزيه مش هيشتغل في حاجة قبل فيلم اسوار القمر لطارق العريان ابدا (يعني مش قبل سنة من دلوقتي)

النهاردة بسمع البوم اصالة الجديد .. نص حالة
وكعادتي دايما ابدأ بالهيد .. حتى لو ماكانش اول تراك في الالبوم
لقيت ان المزيكا غريبة جدا على اصالة
مش ده لون اصالة نهائي
سمعت الاغنية مرة واتنين وتلاتة
واكدب نفسي .. ده مش نزيه .. ده مش نزيه
نزيه مابيعملش اغاني
لكنه اسلوبه جدا ياجدعان
- الجيتار ده انا سمعته قبل كدة
- استخداماته للكمان
- البيانو
- الطبل
حد يصدق ان اغنية لاصالة يكون فيها طبل !!!

Nazih Did It

دورت عالغلاف وفعلا طلعت الاغنية تلحين وتوزيع هشام نزيه


للي حابب يسمعها ..
نص حــــــــــالــــــــــــــــــــة

Baby Doll Night - Deleted Scenes

امبارح اتسربت نسخة من فيلم ليلة البيبي دول متصورة من السينما
لكن من عرض خارج مصر
اعتقد في الخليج (بما انها مش مترجمة يبقى اكيد في بلد عربي)

وده فيديو جمعت فيه 3 مشاهد محذوفة من النسخة المعروضة في مصر
منهم واحد كان فيه مقطع منه بييجي في الاعلان

السؤال دلوقتي ..
ليه الـ 3 مشاهد دول اتحذفوا من النسخة اللي اتعرضت في مصر ؟
هل الرقابة شافت انها غير مستحبة مثلا ؟
هل صناع الفيلم حذفوهم لظبط ايقاع الفيلم ؟(بعيدا عن ان الفيلم ايقاعه واقع كدة كدة بيهم او من غيرهم)
طب ولو ده حصل فعلا
ليه الفيلم يتعرض برة بالمشاهد دي وجوة لا ؟
هو مش ايقاع الفيلم داخل البلد بيبقى هو هو خارج البلد برضه ولا انا غلطان ؟

مجرد فضــــــــــــــــــــــول مش اكتر

وطنية عمرو واكد

من حوالي سنة .. زي الايام دي تقريباً

انتشر خبر بيقول ان عمرو واكد بيشارك في فيلم بطله اسرائيلي
قامت الدنيا طبعا
الناس شككت في وطنيته .. وفي انتماءه لبلده
الصحافة مابتصدق تمسك في حد وتمرمط اللي جابوه

وقف نقيب الممثلين .. اللي شغلته يحافظ على حقوق اعضاء نقابته
وبكل شجاعة
قال "هنحقق مع عمرو واكد"
ياراجل !!
ده بدل ماتساندوه وتقفوا ضد الصحافة اللي بتهاجمه ومش مدياله فرصة يدافع فيها عن نفسه
هتحققوا معاه ؟؟

المهم عمرو واكد برء من التحقيق وطلب من الجمهور في كل الفضائيات والحوارات اللي عملها خلال الـ 11 شهر اللي فاتوا بعدم الحكم عليه او انتقاده الا بعد مشاهدة المسلسل (او الفيلم التليفزيوني عشان ماحدش يزعل)

من حوالي 5 ساعات تم اذاعة الحلقة الاخيرة من المسلسل على
البريطانية BBC الـ
واتفرجت عليها من شوية (كنت متابع المسلسل من اول مابدأ في اواخر يوليو)


المهم
المسلسل مابيدينش العرب .. وشخصية صدام متوازنة جدا
لدرجة تجبر الواحد انه يتعاطف معاها
مااظهروش الراجل بالشكل التقليدي المعروف بأنه ارهابي
وكاره لأمريكا (بدون اسباب) وعنده استعداد بالتضحية بأي شئ في سبيل مصلحته

اي نعم فيه عيوب في شخصيته .. لكن برضه فيه مميزات
وهو ده دور الدراما
الفكرة المتخلفة اللي عند العرب بتاعة ان الرؤساء والمشاهير مايصحش اننا نظهر الجزء السئ فيهم
واذكروا محاسن موتاكم والليلة دي مابياخدوش بيها برة
مافيش انسان سوي على وجه الارض
_____

ارجع تاني لدور الصحافة

افتكر ان عمر متولي شارك في فيلم
(بطل فيلم بيت صدام)ـ Yigal Naor اللي كان بيمثل فيه Rendition
ومع ذلك ماحدش فتح بقه معاه

عمر الشريف هيبدأ تصوير فيلم خلال الفترة القادمة اسمه "عرب راقصون"
لكاتب اسرائيلي اسمه "سيد قشوع"
ياترى الصحافة هيبقى ايه دورها في موضوع زي ده ؟؟

صناع ليلة البيبي دول كان عندهم امل ان الفيلم يدخل المسابقة الرسمية في دورة كان الاخيرة
ياترى لو كان الفيلم دخل فعلا وخرج من غير ولا جايزة
كانوا هيقولوا اصل "ناتالي بورتمان" الممثلة الاسرائيلية والعضوة في لجنة التحكيم هي السبب ؟؟
وياترى لو كان الفيلم كسب .. كان هيبقى ايه رد فعلهم ؟؟

نقاد مصر بيسافروا كل سنة لحضور المهرجانات العالمية
وبيدفعوا فلوس لمشاهدة افلام اسرائيلية
ياترى ليه مابيتحاسبوش ؟
اللي اعرفه ان جزء من ايرادات التذاكر بتروح للشركة المنتجة للفيلم
يعني بالشكل ده المصريين يبقوا بينّفعوا الاسرائيليين
حد عنده تعليق على ده ؟؟
ولا هو حلال لناس وحرام لناس تانية ؟؟

أطلق لخيالك العنان

تخيل خالد يوسف وهو بيستلم اوسكار افضل مخرج لسنة 2010 .. وبيلقي خطاب على الناس بيتكلم فيه عن عظمته وبيكشف فيه انه المخرج الحقيقي لآخر 6 افلام في حياة شاهين

تخيل محمد سعد وهو بيسمع كلام المخرج المكتوب اسمه على افيش الفيلم

تخيل اعتراف رسمي مكتوب بيد اصحاب شركة جود نيوز على صفحة كاملة من صفحات الاهرام اللي بيشتروها عشان يعملوا دعاية لأفلامهم .. بيقولوا فيه انهم "بق" عالفاضي وبيتأسفوا على الهُليلة اللي بيعملوها مع كل فيلم جديد بينتجوه

تخيل وائل عبد الله وهو بيعترف بأن مايكتبه ليس له ادنى علاقة بالكتابة السينمائية .. وانه شوال فلوس وبس

تخيل الجمهور وهو مندفع على شباك التذاكر في محاولة لشراء تذكرة لفيلم يسري نصر الله الجديد

في البوكس اوفيس Top تخيل افلام عامر منيب ومصطفى شعبان وهي الـ

تخيل عامر منيب ومصطفى شعبان تاني وهما بيعملوا 4 افلام في السنة

تخيل يوسف معاطي وهو بيعترف في بيان تليفزيوني بأن افلامه مع عادل امام كلها ماحطش فيها قلم .. وان عادل امام هو الكاتب الحقيقي ليها

تخيل احساسك وانت بتتفرج على الجزء التاني من فيلم نبيلة عبيد .. مافيش غير كدة

تخيل افلام هاني جرجس فوزي -المنتج- من عينة استغماية وعلاقات خاصة بتنافس في المهرجانات العالمية

تخيل غادة عادل في حوار صحفي وهي بتؤكد على عدم وجود اي مواهب فنية عند مجدي الهواري

تخيل سنة تعدي من غير ماتشوف حسن حسني ولطفي لبيب في فيلم شبابي

تخيل وجود اسماء عادل امام ووحيد حامد وشريف عرفة على افيش فيلم واحد زي زمان

تخيل جهاز السينما بينتج فيلمين في السنة

تخيل طارق علام في فيلم بيقعد في دور العرض اكتر من 3 ايام

تخيل نجاح فيلم لأشرف عبد الباقي في السينما

تخيل نبيل علي ماهر ومحمود طلعت بيحلوا محل هانز تسيمر وجيمس هاورد في الجزء التالت من باتمان لكريستوفر نولان

تخيل عودة مصطفى كامل للسينما

تخيل فيلم انتاج مشترك بين مصر وتركيا بعد فيلم "فرار مومياء" .. وياسلام بقى لو مي مسحال والعدل جروب ينتجوه مع بعض

تخيل مي عز الدين وهي افضل ممثلة في مصر

تخيل احمد هارون وهبة السيسي في فيلم الموسم (بحق وحقيقي مش زي اعلان صانسيلك)ـ

قص ولزق -- 3/3

قص ولزق

اخراج : هالة خليل

الأولة في الغرام

البوست ده كنت المفروض انزله من شهرين فاتوا .. لكني نسيته وماافتكرتوش الا من شوية وانا بشوف فيلم الاولة في الغرام على ايه ار تي سينما

المهم دي موسيقى الفيلم .. لتامر كروان

المقطوعة الاولى
يمكن مختلفة عن اي مزيكا عملها كروان قبل كدة
بعد عن سكة الرومانسية المفرطة المتعود عليها
واستغنى عن البيانو اللي بيستخدمه في معظم افلامه
وفي الفيلم ده كانت بداية استخدامه لآلات جديدة في مزيكته زي الترومبيت والساكس

المقطوعة التانية
"Eine kleine Nachtmusik" كروان خد طلعة سيمفونية موتسارت
وعند الثانية السابعة قلبها شرقي بتوزيع جديد

كروان ده عبقري !!ـ

أخطاء مستفذة

في فيلم اتش دبور لاحظت خطء غبي جدا

الفيلم المفروض ان فيه كذا مشهد داخل محل فيديو
وفي محل الفيديو متعلق بوستر قد كدة لفيلم جواز بقرار جمهوري
هتقول لي طب وايه المشكلة ؟؟
هقول لك البوستر عليه صورة بالحجم العائلي لحسن حسني
وحسن حسني المفروض انه ابو احمد مكي في فيلم اتش دبور !!
الغريب ان البوستر ده ظهر في اكتر من مشهد
ومافيش بني ادم من اللي كانوا في اللوكيشن وقت التصوير خد باله من الكارثة دي


الغريب اكتر ان السنة اللي فاتت فيلم البلياتشو كان فيه نفس الغلطة دي
في واحد من مشاهد الفيلم ظهر افيش فيلم 45 يوم بطولة احمد الفيشاوي وعزت ابو عوف
والمفروض ان دول برضه كانوا من ضمن الممثلين في فيلم البلياتشو !!


والغريب اكتر واكتر واكتر .. ان البلياتشو واتش دبور من انتاج الشركة العربية
ونفس الكلام ينطبق على 45 يوم برضه

بركاتك يإاسعاد يايونس